港超聯 狄恩教標準流浪召舊將

作者:Donna    發表日期:2018-05-21 23:53:16

上季分別因紀律及狀態等問題而不獲重用的劉卓軒及黎洛賢,今夏均被標準流浪收歸旗下,兩人異口同聲表示,來季港超聯將珍惜機會,用行動來證明自己!

黎洛賢前季效力夢想駿其首次出戰港超,憑着速度及腳法獲得不少好評,上季轉投香港飛馬,「BB」(黎洛賢)在省港盃的入球更令港隊主帥金判坤大讚。然而飛馬季中改由奇雲邦特執掌後,「BB」的上陣機會被指因紀律問題而漸減,最後唯有離隊他投。在經歷如過山車般的衝擊後,「BB」謙稱會珍惜今次機會:「上季季中球隊轉咗教練,唔習慣球隊踢法,少咗上陣。嚟緊一季希望喺自己態度同表現上有進步,唔可以再浮浮沉沉,機會唔係成日有,要去把握。隊中有啲球員比自己年輕,要樹立一個好榜樣。」

至於2011-12賽季獲選為最佳年青球員的劉卓軒,隨着加盟南華時揚言要減磅的承諾未能兌現,令到自己長坐冷板凳,不過他對來季將再度合作的狄恩給予高度評價:「狄恩喺香港執教過咁多年,及後轉戰印尼聯賽亦獲唔少好評,相信下季可帶領球隊踢出好成績。之前效力南華期間甚少機會出場,體能同心態都有所改變,要多謝莫生(莫耀強)同李輝立俾機會,希望來季喺流浪可以證明自己。」


本文來源:http://hk.on.cc/hk/bkn/cnt/sport/20170705/bkn-20170705174958968-0705_00882_001.html




Tag:
本文鏈接:http://www.trainingcentre-hk.com/17894.html